A  TUDDA ( Agata )

Tudda mia, li toi carezzi

Non mi fannu un gran favori ;

foru d’autri li primizzi ,

ora sunnu sculaturi .

Tudda mia , li fai a lu ventu

Ssi lavanni ca fai a mia ;

sappi certu cu lu stentu ,

l’ogghiu appizza e la liscia .

A’ddu tempu ch’iu bramava

Ciò chi fai prisentamenti ,

m’ammustrasti tanta brava

li scagghiuni ccu li deti .

La risposta ti cunveni

E ti tocca pari passu :

ora ca tu mi voi beni ,

stu miu cori è già di sassu .

Ma non appi da ss’infidi

Toi pupilli un duci sguardu ;

ora tu mi guardi e ridi :

ci pinsasti troppu tardu !

Domenico Tempio ( 1750-1820 )